史浩克 Vs 漢堡 星級射手「大」激鬥

猪拉多纳

11/03/2012
文： Sherry

嘩，周中啲歐洲賽真係睇到小妹眼都凸埋，利華古遜大敗、曼市雙雄喺歐霸盃齊齊輸波，巴塞、華倫、馬體會同畢爾包就全部贏晒，究竟係英超、德甲水準大跌，定西甲真係超晒班呢？點都好，希望英、德群雄齊齊發奮啦，始終畀一個聯賽獨大唔係好事嘛，好似當年屆屆歐聯都係3英戰乜乜咁，睇都睇到悶啦！


好，為咗鋤強扶弱，小妹今個星期一於坐言起行，唔再寫西甲，轉撐德甲啦！今晚小妹就搵到場好嘢，就係史浩克04對漢堡個1.68倍「入球大」喇！

雙爾弗爆 柏歷有卡士

論人腳，史浩克點計都好過漢堡，不過佢哋最近3連敗，狀態麻麻，最弊係史浩克今戰有中堅賀維迪斯腿筋受傷倦勤，另一守將柏柏杜普路斯又要坐波監，焗住用梅斯達同祖爾麥迪比頂上，須知道呢兩位仁兄唔單止係後備，仲要係啱啱傷愈嗰隻，邊靠得住呀？好彩，史浩克防線唔掂，都仲有強大火力搭夠。「魯爾+亨特拉爾」呢對前皇馬鋒將組合，今季加埋已有29個聯賽士哥，以佢哋嘅卡士，直情可以橫行德甲啦！


對家漢堡上周喺主場慘吞史特加4蛋，近3戰亦只得1和2負，狀態同史浩克差唔多o架咋。唔止咁，佢哋件防中查洛林累積咗5面黃牌，今仗會聯同上仗領紅嘅隊友荷西古里路齊齊睇波，實力唔掂兼殘陣，點搞呀？漢堡唯一可取嘅，係佢哋個箭頭柏歷係有料之人，趁對手史浩克中門大開，搵到着數唔奇o架！而且小妹翻查過數據，原來兩軍近6次交手有5鋪開大，有條好路，當然要繼續追啦！（有線61、64、201及204周一凌晨0:30直播）

微博傳情 \(^O^)/

以前聽人講話樣貌係會隨心情而改變，哈，原來係真o架！唔信？有圖為證o架！嗱，左手邊嗰張係小妹啱啱收工，返屋企途中嗰陣影嘅，做咗成日嘢冇街去，梗係又攰又殘，一副悶樣啦！右手邊嗰張雖然都係收工影，不過小妹身處喺鏢場，哈，即係咩？即係小妹抽到時間去掟鏢，所以神采飛揚囉！心情靚靚，返到屋企仲煮咗個長通粉，留番第日返公司食添！係咪睇見都覺得好好味呢！

Sherry靚盤

史浩克04 （入球大）

百足咁多爪嘅大學生，熱愛運動，最鍾意同啲Friend唱K兼睇波，曼聯中場路爾斯安達臣同車仔前鋒費托都係佢杯茶！