拜仁3「芬」袋袋平安

猪拉多纳

10/03/2012
文： 郭球奇

「小豬」舒韋恩史迪加返嚟啦！呢位拜仁慕尼黑副隊長近日終於傷愈練番波，今晚喺德甲主場鬥賀芬咸好大機會復出，大大提升中場實力，加上過往交手從未輸過，球奇睇好拜仁今晚可以做番次好「仁」，開出1.58倍「讓球主勝」！（有線61及64周六晚10:30直播）

拜仁今季表現飄忽，時好時壞，《慕尼黑日報》近日就指出呢支德甲班霸今季由盛轉衰，轉捩點係舒韋恩史迪加受傷。好彩「小豬」經過1個月休息後，日前終於傷愈重新投入操練，今晚好大機會復出，對於近期士氣一般嘅拜仁可謂重大喜訊。

雖然拜仁歇冬後成績一般，9戰僅錄得4勝2和3負，但原來3次主場出擊獲得全勝，更重要係3場冇失波，難得近日陷入球荒嘅射手馬里奧高美斯，賽前亦走出嚟激勵隊友，表示球隊係時候重返勝軌，仲話依家喺德甲排第2，仲有爭標機會，叫大家唔好放棄，一班隊友聽到應該會幾振奮。


賀芬咸近7次對賽不勝


賀芬咸自從換上巴布執教後未輸過，但其實只得1勝3和，唔算太叻仔。呢位前拜仁名將喺上年10月曾帶領哈化柏林作客安聯球場倒戈，點知開波踢咗13分鐘就落後3球，最終慘敗0:4；今日再訪安聯球場，巴布就話好希望今次會有改善，不過睇番往績，原來賀芬咸史上7次對住拜仁不勝，得3和4負，近2次仲要食白果，球員心理上難免輸蝕，何況今場仲有後衞安達斯碧克停賽，巴布嘅如意算盤睇落唔係咁易打得響！


賀芬咸對賽冇運行


日期 戰果
11/10/01 主和拜仁0:0

11/02/12 客負拜仁0:4

10/09/22 主負拜仁1:2

10/01/16 客負拜仁0:2

09/08/09 主和拜仁1:1

09/05/16 主和拜仁2:2

08/12/06 客負拜仁1:2