拜仁速決賀芬咸

猪拉多纳

10/03/2012
文： 蘇斯黑柴

德甲班霸拜仁慕尼黑主場迎戰賀芬咸，拜仁目前聯賽同歐聯都去到生死一線間險境，不過黑柴相信以佢哋嘅級數足以及時振作，今晚主場對弱旅可望速戰速決，1.62倍嘅半全場「主主」可作過關重心。（有線61及64台周六晚10時30分直播）

拜仁上輪聯賽作客不敵利華古遜，已被榜首多蒙特拋離7分，不過佢哋始終有班霸級數，賽後列貝利、湯馬士梅拿同馬里奧高美斯都挺身而出撐教練軒歷基斯，將失利責任攬上身，荷蘭魔翼洛賓亦因為近期狀態欠佳而主動加操，鬥心加零一。雖然歐聯十六強首回合作客巴素利失利，令佢哋三日後嘅次回合賽事非勝不可，但高層已下令唔可以放棄聯賽，今場一樣要去盡。拜仁過去喺歐戰前一向冇乜留力習慣，今場想慳力嘅最佳辦法，係喺上半場解決對手，下半場至有留力空間。

拜仁賽前接到好消息，中場重心舒韋恩史迪加已告傷愈歸隊，雖然會暫列後備，但「小豬」對球隊充滿感染力，佢嘅回歸對全隊士氣足以起到鼓舞作用。


賀芬咸殘陣頂唔住


賀芬咸自升上德甲後7戰拜仁3和4負未贏過，歇冬期仲放走埋王牌前鋒伊比斯域，實力大不如前，新帥巴布雖然係拜仁舊臣，但做教練後先後帶領史特加同哈化柏林回歸母會，最終都係半輸同全輸，尤其上半季帶領哈化作客安聯淨吞4蛋，開波13分鐘已經失咗3粒。

再者賀芬咸上仗主場贏唔到弱旅科隆之餘，拿傑同舒普洛克雙雙勇戰受傷，隊長安達斯碧克累積滿10面黃牌要停賽，中場大將沙利荷域又因唔聽巴布命令被內部停賽，今仗陣容天殘地缺，作客安聯好難頂到半場