紅軍細弱讓唔起黑貓

猪拉多纳

10/03/2012
文： 張志德

踢波唔可以冇火，但脾氣太過暴躁，亦唔會有運行。細鬼其實好欣賞利物浦前鋒蘇亞雷斯，佢腳法好，踢法夠刁鑽，睇佢盤扭認真賞心悅目；不過佢性格火爆，喺球場郁吓就喊打喊殺，咁樣好易影響表現，佢應該學吓美斯，將注意力集中番喺比賽，成就先可以更上一層樓！

利物浦近年成績停滯不前，同球隊投資不當、資源錯配有好大關係，執來執去都不能砌出一隊可以挑戰英超冠軍嘅陣容，只能於盃賽有點競爭力。以前打一個奧雲，之前就打費蘭度托利斯加謝拉特，依家就靠「哨牙蘇」單天保至尊。蘇亞雷斯係好波，佢「扭技」同竄擾力都好強，但把握力就一般，加上佢唔好老脾，早前就發生種族歧視同中指風波，經過長時間停賽，復出後狀態就大不如前。


蘇亞雷斯問題多多


其實踢波專注力好緊要，周時受場內、場外其他無謂問題困擾，發揮又點會好？但依家佢已成「紅軍山寨王」，相信冇乜人敢話佢；希望佢能自我反省，唔係不但影響佢自己發展，對紅軍都冇好處。今晚英超利物浦作客新特蘭，謝拉特上陣成疑，「哨牙蘇」亦靠唔住，讓唔起「黑貓」，捧「讓球主勝」同細盤。（有線201及301台周六晚11時直播）

本港至型足球明星，519入波功臣，現為有線電視台柱級資深講波佬，人稱鬼Sir。鬼Sir睇波有乜獨到見解，毫無保留話晒你知