J League日職明午勁爆開催

猪拉多纳

09/03/2012


受東日本大地震影響打亂備戰，上季日職傳統強隊鹿島鹿角、大阪飛腳同名古屋鯨魚全部出閘脫腳，造就柏雷素爾成為史上首支以升班球隊身份，奪取日職冠軍嘅奇迹。今季日職聽日開鑼，Big3重新上路，旗下球星小笠原滿男、遠藤保仁同約舒亞堅尼地，將會同柏雷素爾嘅李安度杜明基斯爭做日職MVP！


鯨魚兵源足靠堅尼地空襲


名古屋鯨魚喺教練史杜高域執教下，前季歷史性奪得聯賽冠軍，上季又後上以亞軍完成球季，當中澳洲中鋒約舒亞堅尼地以19球成為日職「得點王」，佢嘅空襲成為鯨魚入波方程式，相信佢今季可以踢得更「屈機」，爭取登上MVP寶座。




計劃改踢3-4-3嘅鯨魚，係今季日職陣容最穩定強隊，主要得中堅千代反田充離隊，後防補番甲府風林後衞丹尼爾施華，其餘進攻主力全部留隊，依照佢哋現時嘅人腳，即使兼顧埋亞冠盃都夠殺有餘，約舒亞堅尼地唔需要長期盡搏，絕對係MVP大熱門。




冠軍賠率2.6倍


飛腳大換血助遠藤重生


飛腳喺08年奪得亞冠盃冠軍後，感覺兩頭唔到岸，亞冠盃連續3屆16強出局，日職因為分心拎唔到冠軍，失去以往摧毀任何對手嘅把握。今季飛腳放走教練西野朗，但新教練施拉奧同樣崇尚「贏得開心嘅積極進攻足球」，相信會將遠藤保仁嘅能力發揮到極限，帶挈佢重生。08年遠藤當選亞洲足球先生，但由於年紀同傷患問題，近年踢法冇過去咁進取，甚至經常墮後。不過飛腳今季進行換血，羅致甲府風林前鋒保連奴奧利華拉同FC首爾箭頭李昇烈，積極改革鋒線，遠藤保仁有更多選擇餵波，翻生唔太難。




冠軍賠率3.15倍

柏市贏默契杜明基斯孭飛

柏雷素爾上季神奇奪得日職錦標，士氣最重要。今季柏雷素爾教練尼仙奴繼續留隊，冠軍班底基本上冇改變，射手田中順也同前鋒佐治韋拿願意留低，最重要係上季日職MVP李安度杜明基斯，最終被球迷感動打消離隊念頭，有佢使乜怕。

上季李安度杜明基斯連盃賽攻入18球，佢同田中順也、佐治韋拿夾熟晒，相信今季表現會更加好。更何況除咗那須大亮，柏雷素爾新簽嘅櫪木SC射手列卡度盧保充滿戰鬥力，同樣嚟自巴西嘅佢，照計可以同李安度杜明基斯輕易建立默契，今季大把世界。

冠軍賠率6.0倍

鹿角踢地面戰小笠原派牌

鹿角係日職史上最成功球會，累積15個國內重要錦標，由於失落咗亞冠盃入場券，教練奧利華拉選擇離隊，新教頭佐真奴係巴西94年世盃冠軍成員，重視地面進攻，隊長小笠原滿男嘅閱讀球賽能力同超級致命傳送，肯定大派用場。

今季鹿角放走前鋒田代有三，簽入34歲嘅07年日職神射手祖尼奴，用意係迎合新帥佐真奴嘅戰術，雖然小笠原滿男已經32歲，但佢嘅技術型踢法，未見退步，09年仲當選過日職MVP，只要佢能夠同祖尼奴擦出火花，又帶動到一班小將嘅話，有條件再當選日職MVP。

冠軍賠率8.0倍

首周賽程

3月10日‧星期六

（六）1札幌岡薩多 Vs 磐田山葉

（下午1:00）

（六）2大阪飛腳 Vs 神戶勝利船

（下午1:00）

（六）3名古屋鯨魚 Vs 清水心跳

（下午1:00）

（六）4鳥棲砂岩 Vs 大阪櫻花

（下午1:00）

（六）5廣島三箭 Vs 浦和紅鑽

（下午1:00）

（六）6仙台維加泰 Vs 鹿島鹿角

（下午1:00‧有線148、now711直播）

（六）8川崎前鋒 Vs 新潟天鵝

（下午4:00）

（六）10大宮松鼠 Vs FC東京

（晚6:00‧now633及660直播）

3月11日‧星期日

（日）7柏雷素爾 Vs 橫濱水手

（下午1:00‧now633直播）

賽制：18隊分主場及作客比賽，雙循環制，勝得3分，和得1分，負得0分。

降班隊數：3隊，排名16、17及18位的球隊自動降班。

參加亞洲聯賽冠軍盃隊數：4隊，聯賽前3名及天皇盃冠軍。