卡坦尼亞平手盤切「塞」

猪拉多纳

07/03/2012
文： Combo King

意甲護級球隊切塞納，周四凌晨補賽將於主場對卡坦尼亞。近期切塞納可謂冇場好睇，近七場比賽一和六負未贏過，依家切塞納死氣沉沉，睇怕下季都要返回乙組比賽咯！相反卡坦尼亞喺少帥蒙迪拿調教之下，球員表現愈來愈有朝氣，今場好有機會擊敗切塞納，平手盤必捧客隊。（周四凌晨1時30分開賽）




切塞納喺一月轉會市場相當積極，除羅致前祖雲達斯鋒將伊亞昆達之外，仲加入前拿玻里翼鋒馬里奧辛坦拿。雖然兩名球員有一定名氣，但喺切塞納似乎發揮唔到預期水準，切塞納狀態咁差，單憑主場因素唔足以擊敗對手。




卡坦尼亞整體作客成績的確係麻麻地，但如果將範圍收窄的話，其實卡坦尼亞作客對住下游球隊並唔係想像中咁差。今季卡隊作客路華拿、萊切、帕爾馬及錫耶納都攞到分數，而對萊切及錫耶納仲贏埋。既然切塞納係護級大魚腩，卡坦尼亞贏埋都唔出奇，平手盤應可坐和望贏。


自由盃撐山度士Ｗ


另外南美自由盃方面，其中一場由山度士主場對國際體育會，主W開出機會不低。山度士近期喺州聯演出唔錯，更曾擊敗死敵哥連泰斯，今於主場出擊可捧。至於厄瓜多爾球隊基多主場對沙士菲，客W好分頭博得過。大家都知厄瓜多爾足球水平唔高，而基多本身喺聯賽又交唔到好成績，計級數輸晒畀沙士菲。