利華巴塞大家癲番晚

猪拉多纳

07/03/2012
文： 蘇斯黑柴

歐聯十六強次回合，西甲巴塞隆拿主場鬥德甲利華古遜，巴塞首回合作客已經有三比一領先優勢，入八強已經冇乜懸念。基於目前爭奪西甲聯賽冠軍機會好微，衞冕歐聯成為巴塞首要任務，就算有本錢喺手都唔會手軟，撞正客軍利華古遜冇嘢輸輕裝上陣，仲講明嚟盡情享受魯營球場氣氛，今場勢演大龍鳳，大細中位數調整到3.5球照捧大盤。（有線61及201台周四凌晨3時45分直播）


利華隊長興奮還鄉


當全世界都判咗利華古遜冇出線希望，佢哋反而更加輕鬆，由於啱啱喺聯賽擊敗咗班霸拜仁，全隊士氣一流，狀態大勇嘅隊長卡斯特羅雖然由青年軍開始為德國効力，但佢祖籍係巴塞嘅加泰隆尼亞地區，出生地傑羅納距離魯營球場只有七十公里，今仗會有大批親友同鄉撐場，卡斯特羅上仗對拜仁交出兩個助攻做英雄，今場佢話唔會太計較比數，全隊抱享受心情同巴塞較量，希望交出最佳表現。




由於首回合利華發生守將卡特歷同文奴費特列治爭同美斯換波衫鬧劇，畀傳媒批評嚴重影響德甲球隊形象，前鋒傑斯寧賽前話會為尊嚴而戰，要帶畀巴塞一場印象深刻嘅比賽；至於教練杜特就話波未完唔會扯白旗，總之踢盡睇睇有冇可能會發生奇迹，利華首回合落後緊兩球，佢咁講已經話咗畀大家聽，佢哋去魯營唔係諗住死守算數。


美斯加操求戰欲強


巴塞上場聯賽踢少個都贏希杭三比一，教練哥迪奧拿原本安排該役停賽嘅美斯放假，畀佢周一至歸隊，但美斯主動要求加操，上周末已經返大營報到，求戰欲強，佢同中場布斯基斯聯賽冇上陣，蓄銳等今仗，雖然有阿歷斯山齊士啱啱加入傷兵行列，但巴塞嘅中場有瘋狂攻擊力，今仗有沙維、恩尼斯達同法比加斯支援美斯爭取入球，入波點會少，1.85倍大盤啱心水！