日超級盃國立上演入球騷

猪拉多纳

03/03/2012
文： 九叔

新一季日職下個禮拜先至開波，今日東京國立競技場就有場日本超級盃打頭陣，由上季日職盟主柏雷素爾對天皇盃冠軍FC東京，呢場以娛樂觀眾為目的嘅波，開出1.88倍入球大嘅機會好高。（開賽時間：周六中午12:35）


東京大換血唔夠柏雷素爾砌


話就話係場盃賽，但係呢種無關痛癢嘅波，對賽雙方都係用嚟熱身，備戰日職同亞冠盃。而且今場波仲有個使命，就係宣傳4月上畫嗰套《柯南第11名前鋒》嘅劇場版電影，連柏雷素爾官網都用柯南嚟宣傳今場波，斷估都唔會踢悶波咁掃興啩。




柏雷素爾今季人腳變動唔大，基本保留咗大班奪標功臣，只係補入櫪木SC件巴西前鋒列卡度盧保、那須大亮幾個，雖然响國立嘅對賽往績輸蝕，前鋒林陵平又傷咗，但對住大換血銳意年輕化、連今野泰幸都賣走埋，仲要改由教過大分三神、町田澤維亞嘅澳洲教練普波域揸旗嘅FC東京，贏面始終高啲，而且有權同對手合演一場入球騷。