換帥後戰績唔差 西維爾馬體會難分高下

猪拉多纳

03/03/2012
文： 鄭少偉

西甲前3位已經畀皇馬、巴塞同華倫霸晒，但關係到歐聯外圍賽嘅「四哥」之爭就相當精彩，有份爭嘅球隊數數埋埋起碼半打！今晚西甲尾場由第10嘅西維爾主場迎戰第9嘅馬體會，五五波冇咩高低，「亨利」建議博3.15倍和波！（now632台周日清晨5:00直播）




睇番現階段西甲形勢，排聯賽第4嘅利雲特到第10嘅西維爾都只係得3分之差，每踢一輪之後嘅排位變化都好大，咬得咁緊分分鐘要鍊到最後一輪，先知邊個做到「四哥」！


雙方各有主力射手缺陣


今場交手嘅西維爾同馬體會，兩隊賽前同樣得32分之外，戰績都係8勝8和8負，真係內定都冇夾得咁啱喇！唔只戰績接近，兩隊同樣喺季中換帥後戰績大有起色。馬體會由舊將施蒙尼掌帥之後，錄得6勝4和1負佳績，係上場唔好彩先畀巴塞王牌美斯偷雞快射罰球搞掂，唔係真係可以唔使輸o架！




本來以馬體會近期嘅水準，今場就算作客都值得支持，可惜王牌射手法卡奧同中堅高甸都要停賽，實力點都削弱多少，撞啱主場嘅西維爾換帥後兩連勝，證明佢哋一樣唔好惹，只可惜佢哋又有首席射手尼格度打柴，咁嘅環境一於博佢哋和氣收場，我哋 就和氣生財喇！