西布朗心雄大鍊車

猪拉多纳

03/03/2012
文： 張志德

踢波最緊要氣勢，尤其係弱旅，難得連場報捷個勢咁順，個心一定雄晒，就算面對勁旅都必定搶攻！英超西布朗近期瘋狂發飆，接連大數狼隊同新特蘭五比一、四比○，其中前鋒奧丹維治一共轟入五球，今晚喺自己地頭迎戰車路士，細鬼捧大！




（有線201及301台周六晚11時直播）


車仔防線鬆散咗


西布朗本季由鶴臣領軍，呢個前富咸、利物浦領隊擅帶小球會，今季西布朗算四平八穩，但近兩仗就突然大爆發，分別大勝狼隊、新特蘭。贏狼隊唔奇，但屠殺「黑貓」就令細鬼另眼相看。當然，贏兩場唔等於西布朗會持續起飛，但球隊氣勢咁強，今晚再度主場出擊唔會縮，有利開出入球大。




車路士近期面對內憂外患，領隊保亞斯帥位不穩，有傳前主帥莫連奴下季會回歸掌舵；中堅大衞雷斯又公開批評林柏特，叫佢唔好以為自己於球隊有特權，加上球隊成績飄忽，今仗客Ｗ有1.78倍分頭，似乎莊家都唔算太睇好佢哋獲勝。車仔以前後防堅固，但近三場作客都有失波，於愛華頓失兩粒，連史雲斯都可以攻破車仔大門，故今仗大盤應可順利開出。另外，西布朗主場成績麻麻，細鬼認為客Ｗ可以兼顧。


張志德


本港至型足球明星，519入波功臣，現為有線電視台柱級資深講波佬，人稱鬼Sir。鬼Sir睇波有乜獨到見解，毫無保留話晒你知。