多蒙特緬恩斯 神鋒大戰

猪拉多纳

03/03/2012
文： 蘇斯黑柴

德甲壓軸戲上演「高普打吡」，少帥高普帶領多蒙特主場迎戰母會緬恩斯，兩軍向來淵源極深，多蒙特喺交鋒史上冇明顯優勢，今場主Ｗ熱到1.23倍唔值博，基於雙方箭頭近期都有神級表現，今場對碰隨時擦出火花，捧1.59倍入球大更穩。（有線61及201台周日凌晨1時30分直播）




多蒙特上仗擊敗漢諾威，已累積聯賽7連勝，目前於聯賽榜領先拜仁慕尼黑4分，加上唔使兼顧歐戰，爭霸形勢樂觀，但今次係佢哋喺高普執教後第4次7連勝，但之前3次都斷纜，加上多蒙特對緬恩斯往績上冇優勢，佢哋過去11次碰頭，多蒙特只贏3次，近4季多蒙特主場對緬恩斯更全數和波收場，高普面對母會並冇贏波把握。何況緬恩斯近期狀態都弗，聯賽保持5場不敗，多蒙特捧得太熱確有戒心。




今仗係雙方「神鋒」大對決，多蒙特箭頭羅拔利雲度夫斯基弗到爆，上仗對漢諾威梅開二度，至今聯賽已累積16個入球，位列射手榜三甲，亦因為佢嘅超卓表現，迫使原本係高普契仔嘅穆罕默德施丹長坐冷板，呢位高普喺緬恩斯時代嘅愛將，最終喺歇冬期第三度重返母會，但該埃及射手始終有級數，重返緬恩斯後立即進入狀態，連續4場都有波入，成為球隊救世主，今晚兩人對決自然成為賽事焦點。


兩軍防線唔齊腳


事實上，雙方今仗防線都唔齊腳，緬恩斯守將普斯比治同保史雲遜養傷，卻治賀夫累積5面黃牌要停賽；多蒙特亦有隊長兼主力防中基爾停賽，另一防守中場施雲賓達亦只係帶傷上陣。形勢上多蒙特矢志衞冕主場必搶攻，啱晒擅打突擊嘅緬恩斯，客軍少帥杜曹亦係有料有志氣之人，今仗面對師兄高普唔會做懦夫，兩軍駁火入波唔會少。