約旦打真軍國足冇運行

猪拉多纳

29/02/2012
文： 朱楓

今晚中國（紅衫）會喺廣州同約旦合演世界盃亞洲區外圍賽A組「收宮戰」，賽前國足教練甘馬曹講明要贏波兼唔失波，弊在隊波未打就攰爆，仲鬧中堅荒，對住認真備戰嘅約旦，隨時又因壓力過大而死火，國足讓1球朱楓寧買1.88倍「讓球客勝」！（廣東體育及中央5台周三下午4:00直播）


中堅傷剩兩件 黃博文停賽


一早出局嘅中國，為喺煞科戰贏約旦攞番個尾彩，日前特別約戰科威特，雖然最後贏2:0，但之後竟然冇留喺廣州，反而成隊走去清遠練波，再搭車落廣州踢今晚嘅賽事，難怪班球員埋怨今場似作客。上任後一直冇乜表現嘅主教練甘馬曹話明今晚一定要贏波兼零失球，可惜班人唔爭氣，繼李瑋峰、杜威同鄭智3大主力後，馮瀟霆啱啱亦因傷離隊，搞到只得番張琳芃同趙鵬兩件中堅可用，中場趙旭日又傷埋，黃博文仲坐波監添。




雖然喺A組提早出線，但據報約旦為爭首名，以便喺10強賽抽好籤，今戰對中國勁認真，日前同伊朗踢熱身賽一度領先2球，最後打成2:2，而且仲比中國隊早3日去廣州適應，而且堅持「每日兩練」，態度超積極，試問中國點讓得起佢哋？