德國破法立威

猪拉多纳

29/02/2012
文： 蘇斯黑柴

國際熱身賽重頭戲，世界排名第2嘅德國主場迎戰排17嘅法國，比賽安排喺雲達不來梅嘅韋沙球場舉行。人才輩出，進步神速嘅德國隊近期喺領隊勒夫手上專殺強敵，主場面對跌Watt名牌法國贏面甚高，1.48倍主Ｗ可視為過關重心，單頭仲可以捧埋有2倍嘅「半場主勝」。（無綫翡翠台周四凌晨3時45分直播）




德國隊自世盃後熱身賽成績唔算突出，近9場熱身賽僅3勝5和1負，不過勒夫領軍對弱隊經常hea踢，但對強隊就勢必搏命，過去一年面對世界前10名球隊4戰取得3勝1和佳績，擊敗過荷蘭、巴西同烏拉圭，只係同意大利打和，今仗主場遇上已經25年未贏過嘅法國，當然有決心搏殺立威。


上仗對荷蘭神級表現


德國今仗人腳唔算齊，隊長拿姆同副隊長舒韋恩史迪加都因傷缺陣，另外梅迪薩卡、普多斯基、馬里奧葛斯同施雲賓達亦冇入選，不過德國人才輩出，正選陣容戰鬥力依然強勁，賽前消息指勒夫今仗會將隊長臂章交畀箭頭高路斯，呢位老將今季加盟拉素後技術、射術同無私嘅足球智慧更加爐火純青，而且狀態大勇，至今已為拉素喺意甲射入12球，上仗聯賽對費倫天拿亦一箭定江山。




高路斯喺去年底大勝荷蘭3:0嘅熱身賽中踢出神級表現，兩傳一射足以令全世界折服，德國入第三球之後全隊11名球員一齊相擁慶祝，球隊喺佢帶動下可謂空前團結。




法國隊過去一年都未輸過，但並未遇上真正強隊，面對克羅地亞、智利同波斯尼亞呢啲二流對手都贏唔到，戰鬥力唔係德國嗰皮，雖然靈魂人物列貝利啱啱為拜仁梅開二度狀態大勇，但支援佢嘅一班法甲本土聯賽兵艾馬菲連奴、馬維拿、馬雲馬田同基奧特級數稍遜，作客對住升勢中嘅德國，要頂到半場都唔容易。