保亞斯方寸亂難服眾

猪拉多纳

25/02/2012
文： 江忠德

車仔內部矛盾白熱化，保亞斯嘅領軍能力只限於球場上戰術運用，但處理人事關係就冇晒符，畢竟佢咁後生仲未夠火候，真係唔多夠人生經驗去面對，結果搞到隊波氣氛鬼咁差，今晚對住保頓又唔知會踢成乜嘢款？




周中歐聯輸畀拿玻里一役，顯示出保亞斯方寸大亂，初時企喺場邊指手畫腳，仲要七情上面，到之後大勢已去，就靜雞雞坐喺度等運到，要勞煩助教迪馬堤奧提場，咁嘅態度只會令佢同球員嘅關係進一步惡化。


冷落林柏特又搵佢救火


事實上，保亞斯既然唔想重用林柏特，就應該堅持到底，奈何每到關鍵時刻又要搵佢救火，班大佬自然睇唔起呢個領隊，連帶班細都懷疑佢嘅領軍能力，試問又點會喺場上賣命，搞到前面入埋都唔夠後衞輸！




車路士近4場聯賽夾埋失9分，喺英格蘭足總盃又和波，歐聯亦面臨出局，今晚對手保頓當然都想趁佢病攞佢命，呢班波一喪起上嚟，就一於有前冇後，打死罷就，話之你係乜水都照砌，既然兩隊同樣搶分心切，呢場「大」有睇頭！