曼城「護城炮」主場打爆布力般

猪拉多纳

25/02/2012
文： 走肖

「野獸效應」唔講得笑！雖然泰維斯未正式解凍，但聽到佢即將回歸爭位，一班箭頭好似阿古路、迪斯高同巴洛迪利驚死被打入冷宮，即刻輪流踢好波，領隊文仙尼嘅「護城炮」儲番滿能量，睇怕都冇邊隊頂得住！曼城今晚喺英超主場對布力般流浪，就算讓到兩球都照撐2倍「讓主」。（有線200及300、廣東體育周日凌晨1:30直播）


阿古路 迪斯高腳風順


根據文仙尼所講，泰維斯要操多2至3個星期至可以正式復出，但即使係咁，阿古路、迪斯高同巴洛迪利一班射手聽到後依然勁緊張，當中阿古路得到球王外父馬納當拿到曼徹斯特探班後，日前歐霸盃對波圖開波18秒閃電入波，個人近4場勁入3球；至於迪斯高都唔執輸，個人近7次上陣入4球，擺明唔想入雪櫃。




講到前鋒，當然唔可以漏咗「腦殘」巴洛迪利，佢喺聯賽停賽4場期間，只係踢過對波圖嘅歐霸盃32強首回合，嗰場波佢冇波入，但就逼到對手擺烏龍，而且被敵對球迷種族歧視都沉得住氣，呢場佢回歸英超，好有可能打正選，證明佢都開始識諗，如果唔係，泰維斯一旦復出佢好易無碇企。


布力般近6次交手不勝


另一方面，布力般流浪近8場聯賽有3勝2和3負，暫時脫離榜尾位置，當中更曾經打和利物浦，同埋爆大冷贏曼聯。不過咁，「暴力般」近6次對住曼城僅得1和5負，當中仲有2次至少淨輸3球，今場再有前鋒積遜路維同後衞基維要坐波監唔踢得，被迫變陣更加靠唔住，隨時畀文仙尼嘅「護城炮」炸到散晒，慘敗唔出奇。