噴射機抹靚副偈捧德過

猪拉多纳

24/02/2012
文： 立民

今日下午澳職上演紐卡素噴射機主場對阿德萊德聯，噴射機踏入2012年有回勇迹象，近九戰取得四勝二和三負，其中主場只係輸畀威靈頓鳳凰，依家目標係搶分爭入季後賽，鬥心十足。阿德萊德聯防守唔掂，加上要分心踢亞冠，此消彼長之下，主勝捧得過。




（有線64及204台周五下午5時直播）




唔知大家有冇發覺，社會地位愈高嘅人，就愈怕畀人質詢！其實呢個情況唔止香港先有，放諸四海、包括澳職都通用。




榜尾黃金海岸聯早前就發生有錢班主彭爾馬「發老脾」事件，怒炒教頭比利貝治。事緣比利貝治喺傳媒面前怒數班主不是，記者見機不可失就向彭爾馬問長問短。班主見落唔到台，就送碟「豉椒炒魷」畀比利貝治。


阿德萊德聯分心亞冠盃


其實諗深一層，澳職教練唔易做，今季十隊波，被炒嘅教練就已經有四個咁多！本來我以為紐卡素噴射機喺季中都有機會換主帥，不過球隊踏入今年表現回勇，近四場更贏咗三場，前鋒布洛奇狀態更係唔錯，主場出擊隨時又有波入。




至於阿德萊德聯近排有啲打回原形咁款，後防經常出現甩漏，仲要兼顧亞冠盃，以佢哋嘅級數難以雙線作戰，同埋阿軍近六次作客噴射機輸咗四場，捧主隊為佳。

立民推介：紐卡素噴射機 Vs 阿德萊德聯 主勝

phone波熱線：1831 678

電郵：soccer64@cabletv.com.hk

「球盤龍門陣」開放時間：晚上10:30至晚上11:50