利物浦搶盃炒起白禮頓

猪拉多纳

19/02/2012
文： Sherry

呢期「J-Lin」紅到發紫，變咗小妹「飛佛」，至於小妹第四最愛、利物浦前鋒蘇亞雷斯就慘，負面新聞多多，希望佢撐得住，今晚喺足總盃16強幫紅軍炒白禮頓啦！（now671、672台及廣東體育周一凌晨0:30直播）




小妹一向係體育兼帥哥熱愛者，「林瘋」點勁唔使多講，望埋去仲有少少周杰倫Feel，很「屌」哦！仲有佢每次「發完癲」受訪，都會答謝隊友，又話會繼續努力，咁好仔，冧死人咩！嚟緊星期六朝早10點，「林瘋」會出戰新秀賽，到時大家一定要黐實個電視，幫佢打氣呀！


唔信哨牙蘇種族歧視


講番推介，今晚利物浦喺足總盃16強鬥英冠球隊白禮頓，雖然小妹好欣賞嘅蘇亞雷斯（圖）近排勁多負面新聞，不過小妹認為一個咬人耳仔、唔肯握手做戲、大情大性嘅人，有歧視行為怕咩認？假設係佢唔啱，點解佢會咁唔妥艾拉？勁多疑點囉！今晚佢落場，小妹點都會撐佢嘅！


白禮頓陣容不整


即使唔講個人喜好，其實除咗聯賽盃，足總盃係紅軍另一爭標希望，鬥心唔使懷疑，反而白禮頓有機會踢升班附加賽，戰意實力都唔及利物浦，中場史柏羅、迪加及守將湯美艾菲克又分別因停賽及受傷缺陣，一於熱捧紅軍1.5倍「讓球主勝」啦！


英格蘭足總盃賽制：


今輪為16強，若打和需擇日重賽。


微博傳情　\(^O^)/


尋日係老友阿聲生日，小妹幾忙都好，當然都有抽時間去賀一賀佢啦！阿聲﹐喺度同你講多聲 Happy Birthday，最緊要就係身體健康！

Sherry靚盤：利物浦（讓球主勝）

百足咁多爪嘅大學生，熱愛運動，最鍾意同啲Friend唱K兼睇波，曼聯中場路爾斯安達臣同車仔前鋒費托都係佢杯茶！