巴塞細火煲粥 滾唔起蝙蝠

猪拉多纳

19/02/2012
文： 查理阿蛋

「地上最強」近排步入罕見低潮，衞冕聯賽幾近絕望，傳聞即將續約嘅主帥哥迪奧拿決定為未來鋪路，集中火力於歐聯。雖然係咁，巴塞今晚西甲迎戰作客唔掂嘅華倫西亞，小妹覺得佢哋憑住「魯營威力」仍然有力小勝，一於冷敲3.95倍「讓球和」啦。（now632台及廣東體育周一凌晨4:30直播）


美斯第200場代表巴塞


雖然巴塞上場歐聯作客3:1贏利華古遜，但小妹絕對唔認為呢個賽果代表「地上最強」真正復甦，一來利華古遜唔算係咩頂尖球隊，二來有睇場波都知巴塞成個上半場冇乜具威脅攻勢，後防面對利華嘅高速反擊更險象環生，如果唔係靠「美斯魔法」，真係未必贏得到。




今場正正係美斯為巴塞踢第200場比賽，亦係佢加盟巴塞十周年，呢支加泰羅尼亞雄師要贏坐擁菲侯利、皮亞堤等高質球員嘅華倫西亞，就要靠呢位「球王」再施法術喇。雖然哥迪奧拿同班球員不斷重申唔會放棄聯賽，不過佢哋都心知西甲冠軍已經凍過水，所以哥帥今仗決定畀傷患頻頻嘅沙維繼續休息，明顯係要為之後一連串歐聯賽事鋪路。


丹尼爾 馬斯真蘭奴停賽


巴塞今季嘅致命傷係防守不穩，今場丹尼爾同馬斯真蘭奴停賽、碧基又不在狀態，面對華倫西亞嘅快速反擊真係隨時失守。好彩巴塞喺魯營演出向來有保證，深陷頹勢近6仗主場聯賽仍然全勝，反觀華倫近5場作客都贏唔到，就算巴塞喺聯賽稍為收油，但係有例必交足貨嘅美斯，加上恩尼斯達及把握力極強嘅阿歷斯山齊士在陣，要小勝應該冇問題。


橫數千軍


巴塞主場交手5連勝




‧近5次主場對華倫全勝。

‧開季至今主場有15勝3和。

華倫近戰旺開雙

‧對上6場4次開入球雙。

‧近11場得2次半場落後，其餘4次領先、5次打和。