祖記碌卡捱細界

猪拉多纳

18/02/2012
文： 巨高

祖雲達斯今輪意甲主場迎戰西西里島球隊卡坦尼亞。祖記今季仍然保持不敗，成績驕人，但衰在球隊攻力疲弱，少有大勝。今場縱然面對實力較次嘅卡坦尼亞，但相信「斑馬兵團」都幾難大炒對手，細盤有分頭揸得過。




（周日凌晨３時45分開賽）




祖雲達斯教練干地今季長期重用馬特尼及胡仙歷一對前鋒，惟二人狀態已見回落，尤其係馬特尼，演出遠離最佳水準。就以周中補賽對帕爾馬為例，馬特尼踢落力不從心，根本畀唔到對手任何威脅。




至於胡仙歷狀態雖比馬特尼優勝，奈何腳風唔順多場冇「士哥」，最慘係「首席」後備前鋒加利亞雷拉自從重創後火力打折扣，表現同佢効力森多利亞或拿玻里時差好遠。祖雲達斯前鋒個個啞火，好難期望今晚可取得大勝。


卡坦尼亞玩死守


卡坦尼亞向來都唔係一支擅攻球隊，在阿根廷射手麥斯盧比斯轉投ＡＣ米蘭之後，球隊攻擊力勢必進一步向下滑，所以今仗面對強隊祖雲達斯，卡坦尼亞更加唔會推前進攻，以免暴露太多空位畀對手，形勢使然，卡坦尼亞好難取得入球。既然主客兩隊都缺乏入球把握，２倍細盤唔捧等幾時！