雄心餓鬼執金

猪拉多纳

17/02/2012
文： 立民

今日澳職墨爾本雄心主場對黃金海岸聯，可謂海軍鬥水兵大戰，兩隊同樣已經八場不勝，起落較大嘅係曾經一度試過高踞第二嘅雄心，主因係教練雲斯捷將於季尾走人，以及主將費列特歷高受傷，賽前傳出費列特歷高可以復出，有助振奮士氣，所以今場揀番墨爾本雄心主勝。（有線64及204台周五下午5時直播）




雄心陷入低潮有兩大原因：首先係教練雲斯捷已經講咗季尾走人，軍心從而大亂；另外球隊重心、巴西中場費列特歷高受傷缺陣，佢養傷八個星期，球隊就八場不勝，你就知佢有幾大影響力！幸好有傳費列特歷高今場可以復出，咁一定係個好消息，因為佢助攻確係有一手。


黃金海岸聯半放棄


「水兵」黃金海岸聯今季情況有啲似上季尾放軟手腳嘅北昆士蘭風暴，主力全部係青年軍，好似夏朗特同賀路雲，要求呢班細路幫手走出低潮真係談何容易，所以呢場捧主隊雄心贏波。




另外，近來最炙手可熱嘅政界話題係乜？梗係兩個特首候選人不斷被揭黑材料啦！佢哋兩位點拆彈至係主菜，結果再次高低立見。原來一張未被證實嘅施工圖則，就足以令形勢再度扭轉，支持者紛紛轉軚……




而喺體育界最hit嘅，唔使問都知陷入咗「林瘋傳奇」啦！體育迷已經畀林書豪嘅精彩表現洗版，紐約人首次攞到開季七連勝，呢個可能係意料中事，但林書豪繼續發光發熱又不失風度，就係意料之外。