多蒙特名「利」雙收

猪拉多纳

11/02/2012
文： 走肖

收得人錢，就梗係要交貨至得，多蒙特今晚喺德甲主場對利華古遜，一於再追「讓球主勝」。近期多蒙特幫班捧場客贏到笑晒口，主贊助商決定提前延長贊助合約，加上狀態大勇嘅香川真司有廣告出街，呢個時候，多蒙特有咩理由會放軟手腳先？（有線61及64周六晚10:30直播）




自從多蒙特喺歐聯出局，歇冬後重新撻着，對上4場至少淨勝對手2球，對住漢堡都大炒5:1，除咗專心放番喺聯賽搏殺，贊助商效應睇怕都有幫助，因為最近「蜜蜂兵團」同主贊助商傾新約，由於有成績，原本每年750萬歐元（約7,708萬港元）到2013年約滿嘅合約，改成每年1,050萬歐元（約10,971萬港元）到2016年屆滿嘅新約，旺開當然唔想停。


香川新廣告出街


同時間，香川真司嘅新鬚刨廣告「黃金剃刀」即將出街，為咗令自己更受注目氹贊助商，相信佢會加多兩錢肉緊入多幾球靚波，又或者交多幾腳助攻。再講，現時多蒙特只係以2分騎住拜仁慕尼黑同史浩克04，榜首位置唔算穩陣，趁住利華古遜近4場聯賽失8球防線散散哋，撐香川真司帶挈多蒙特贏波有着數。