巴塞跌Watt搞唔掂蝙蝠兵團

猪拉多纳

08/02/2012
文： 亨格比利

巴塞隆拿同華倫西亞今晚又再鍊過，為西班牙盃決賽席位打餐懵。揸住1個作客入球嘅巴塞係有主場之利，弊在佢哋最近跌晒Watt，恩尼斯達同柏度洛迪古斯亦只係啱啱復操，狀態未必十足，4強次回合對住戰意旺盛嘅華倫西亞唔易食o架，「讓客」有成4.5倍博得過吖！（now632台周四凌晨4:00直播）


恩尼斯達 柏度復操


「地上最強」賽前收到好消息，除咗沙維回歸正選陣容，就係恩尼斯達同柏度洛迪古斯已經喺前日復操，之不過佢兩個抖咗一段日子，點都要花啲時間操番起狀態啩，況且《世界體育報》話防中布斯基斯左膝縫咗15針，今晚好大機會聯同另外兩位十字軍阿費利、韋拿齊齊缺陣。


睇番巴塞近期戰績，對上4仗贏得1場咁大把，上場波對住皇蘇亦只係險勝2:1，唔係好醒o架咋！加上哥迪奧拿好興派副選門將賓度出戰西盃，呢位仁兄首回合喺禁區外犯手球雖然逃過一劫，但就睇得出佢係幾咁鹵莽，以「地上最強」近10仗只得兩場保得住清白之身嘅走勢嚟睇，矢志搶攻嘅華倫唔係冇機o架！


華倫留力博今鋪


首回合雙方各一言和，西盃採取作客入球優惠，即係話「蝙蝠兵團」去到魯營都會照攻。況且華倫主帥艾美利好鬼重視呢隻盃，上場聯賽同馬體會明明咬得好緊，但都早早將首席射手蘇爾達杜同中場皮亞堤換走，擺明想留力同巴塞撼，鬥志同人腳都有保證，絕對夠本錢同巴塞死過，受讓就梗係抵捧啦！

首回合：巴客和1:1

西盃賽制

賽事採主客兩回合淘汰制，今場為4強次回合，若總比數相同，作客入球較多一隊晉級，再和則於次回合後加時。若加時入球數字相同，客隊將憑作客入球優惠晉級，若加時沒有入球，則互射12碼決勝。

賽果熱線：2707 9900

周四凌晨2時20分起至晚6時止