黑貓1.5倍晉級穩陣

猪拉多纳

08/02/2012
文： 樂比堅尼

香港時間周四凌晨上演英格蘭足總盃第四圈重賽，米杜士堡主場對新特蘭，今場係東北打吡，上次陷於苦戰嘅「黑貓」新特蘭，幾經辛苦先逼和一比一，今次作客米杜士堡雖然勝算較高，但隨時和波踢到加時或互射十二碼，樂比仔認為保守啲捧新特蘭「晉級」好過，有1.5倍回報算不俗。（now 671及672周四凌晨3時45分直播）


新特蘭上次主場對米杜士堡可謂踢得相當辛苦，開波十六分鐘就畀米堡嘅巴利笠臣先開紀錄，要踢到下半場先由費沙甘保扳平。雖然新特蘭實力較強，但整體攻力唔算銳利，面對一心死守嘅米堡，「黑貓」要強攻對手有一定難度，所以成場波優勢唔算明顯，今場要作客，「黑貓」肯定踢得更辛苦。


不過，實力高一班嘅新特蘭，晉級機會始終係大過英冠嘅米杜士堡，尤其係佢哋近況唔錯，自奧尼爾接手後成隊波脫胎換骨，近八仗取得六勝一和佳績，當中六場作客更係全部贏盤，所以樂比仔對新特蘭晉級信心十足。

米堡三連和頂得下

但考慮到今場係打吡戰，而且米堡上場踢得唔錯，博客W嘅話，不如穩陣啲玩「晉級」，畢竟米杜士堡防守力唔錯，防線嘅賀迪、巴迪斯都具備英超經驗，加上米堡近三場都係和波，今場再和新特蘭一啲都唔奇，無謂太貪心，一於捧1.5倍客隊晉級。值得一提係兩隊晉級之後，將會同阿仙奴爭入八強。