巴塞揼本請Full time中堅

猪拉多纳

08/02/2012

縱然巴塞青訓系統強勁，但近年都係偏重出產好嘅中前場球員，防線只得碧基一個。有見及此，巴塞今夏將主要收購後防球員，除咗打算搵心儀已久嘅加里夫巴利之外，另一目標就係AC米蘭中堅堤亞高施華。


由於隊長佩奧爾過多兩個月就三十四歲，加上佢近年傷患纏身，成日都無法上陣，長時間要布斯基斯及馬斯真蘭奴做替工都唔係辦法，所以巴塞已決定在今夏重金收購中堅。據西班牙《馬卡報》透露，巴塞已經鎖定AC大將堤亞高施華為頭號目標，據悉「地上最強」願意出價3,000萬歐元羅致，AC大有機會睇錢份上放人。

哥帥睇中加里夫巴利

至於另一目標就係熱刺飛翼加里夫巴利，巴塞近年最弱一環就係左翼位，教練哥迪奧拿嫌老將艾比度助攻力較遜，所以一直都想換人。雖然加里夫巴利近年已經少踢左閘，但喺巴塞體系中，閘位球員隨時仲前過中場，巴利來投應該好啱踢。