皇馬保榜首打爆「基」

猪拉多纳

04/02/2012
文： 郭球奇

皇馬今季繼續畀巴塞剋死，但對住其他球隊優勢仍然好明顯，基達菲就係其中之一，主將C朗對住呢支同市宿敵，仲特別有入波運，撞正基達菲今晚仲要唔齊腳，球奇睇好皇馬可以再下一城保住榜首優勢，捧1.72倍「讓球客勝」！（now632台周日凌晨3:00直播）




雖然早前喺西盃出局，但皇馬上周返番聯賽立即反彈，主場輕取薩拉戈薩3:1，當中格尼路、卡卡、沙比阿朗素同奧斯爾4大中場同時上陣，表現仲出奇地好，球奇預期教頭莫連奴今仗將照辦煮碗，誓領「銀河艦隊」再贏一仗，力圖擴大榜首領先優勢。


莫連奴警告咪輕敵


據西班牙《阿斯報》報道，莫帥喺日前一課操練中警告球員要小心基達菲，唔好過分自信，因為基達菲係今季唯一贏過巴塞嘅球隊。備戰咁認真當然好，但其實皇馬近6次對基達菲錄得全勝，當中C朗加盟皇馬後，4次對基達菲更轟入8球，順到冇人有。賽前皇馬官網話中場沙比阿朗素同左閘馬些路有傷今晚可能缺陣，不過翼鋒迪馬利亞就終於傷愈復操，料會進入最後大軍名單，話唔定會成為皇馬嘅秘密武器都唔定。


基達菲三線唔齊腳


對家基達菲近況唔錯，上場作客贏利雲特2:1後，已保持6場不敗，據講教練路爾斯加西亞近日仲狂練三防中陣式，希望可以堵塞皇馬嘅進攻，可惜佢哋今場偏偏有射手古爾沙同中堅盧普雙雙停賽，中場柏度李安亦因條款所限未能倒戈，三線都有主力唔出得，對住人強馬壯嘅皇馬，再一次俯首稱臣睇怕在所難免。


皇馬專剋基達菲


日期 戰果




11/09/11皇家馬德里 4:2 基達菲

11/05/11皇家馬德里 4:0 基達菲

11/01/04基達菲 2:3 皇家馬德里

日期 戰果

10/03/26基達菲 2:4 皇家馬德里

09/10/31皇家馬德里 2:0 基達菲

09/04/21皇家馬德里 3:2 基達菲