加納和波都掂入球唔慌多

猪拉多纳

01/02/2012
文： 自由恒

今屆非國盃分組賽踢到最後一輪，係時候稍作總結，有別於一般大賽，並唔係一味旺下盤同入球細，頭20場分組賽只開出9個下盤及9場細，不過今屆嘅兩大熱門科特迪瓦同埋加納，夾埋踢咗5場都開細，先至令人最始料不及。不過睇番埃及喺之前3屆嘅奪冠之路，都係去到淘汰賽先連珠炮發，所以今晚加納對畿內亞嘅D組終極戰，都係追多次入球細。




如果你嫌昨晨科特迪瓦1.68倍主W太筍，咁今晚加納個W有成2倍就更危險，事關呢粒非洲黑星雖然未篤定出線，但其實和波就已經夠取首名資格，相信有輕傷嘅射手基恩會抖一抖，好彩中堅文沙（圖右）坐完波監，就算前面入唔到波，都可望連續3場分組賽保持不失。


畿內亞出線形勢被動


至於對手畿內亞，由於對賽成績不及馬里屈居第3，今仗極可能贏都冇用。上仗佢哋雖開出今屆首個「其他」波膽，但入6粒都係皆因對手博茲瓦納實力唔掂仲要打少件，所以咪太高估佢哋嘅火力，若同時間開波嘅馬里一早入波，畿內亞隨時提早放棄都未定。（now676台周四凌晨2:00直播）


非國盃D組


足球重心：加納（入球細）




馬膽推介：2場6 永同至尊




前仗沿途外疊放頭都唔散，上仗排12檔焗住留後一樣追得近，今仗排得4檔兼強配韋達，係季內爭功嘅黃金機會。