史雲斯拿手揸大膽「車」

猪拉多纳

31/01/2012
文： 阿占

今季新升上英超嘅3支球隊當中，最勁嘅肯定係史雲斯，論陣容佢哋雖然同豪門冇得比，但佢哋嘅純熟地面踢法同高速入滲，畀人話係「威爾斯巴塞」亦有道理，今晚史雲斯喺英超快車主場出擊，有力搞到車路士失分，正路要2.05倍「讓球主勝」。（有線204及304周三凌晨3:45直播）


史雲斯雖然只係「平民球隊」，但勝在球員一落到場就勁有heart，所以極受球迷歡迎。佢哋好波之人比比皆是，尼敦戴亞同史葛冼佳亞嘅速度，就搞到一眾英超後衞食盡苦頭，車路士要搵論論盡盡嘅大衞雷斯同速度唔高嘅泰利招架，真係好容易出事。

車路士中場拉美利斯抖1個月

除咗膽正命平夠晒搏，地頭向來係史雲斯搶分嘅武器，佢哋今季踢咗10次主場聯賽，竟然攞到5勝4和1負嘅絕佳戰績！對上嗰兩次主場，就分別以1:1打和熱刺，同埋3:2反勝阿仙奴，照咁睇，車路士分分鐘成為連續第3間喪師喺自由球場嘅倫敦大球會。


車路士雖然近期戰績回穩，不過表現仲係冇乜說服力，上場足總盃就只靠一個爭議性12碼淘汰昆士柏流浪。事實上佢哋近4次作客聯賽有3場打和，家陣杜奧巴同沙洛文卡勞都仲踢緊非國盃，中場拉美利斯又因膝傷抖1個月，人腳買少見少，作客讓波信唔過！


頂占筍盤：史雲斯（讓球主勝）