曼市雙雄英超鬥衝

猪拉多纳

31/01/2012
文： 朱楓

盃賽失意，聯賽求翻身！英超曼市雙雄上星期分別喺聯賽盃同足總盃出局，唔想今季四大皆空，聯賽爭霸仲點可以失手？不過兩軍近排狀態同樣反覆，今晚「一哥」曼城同「老二」曼聯喺英超快車分鬥愛華頓同史篤城，小心陰溝裏翻船呀！

曼城輸氣「細」唔識食糖

近期接連喺兩項盃賽出局嘅曼城，今晚返番英超作客愛華頓，當然想贏波保住優勢啦！弊在佢哋近年對親「拖肥糖」例冇運行，好彩今場有隊長高柏尼復出鎮守後防，算過度過，呢場似乎捧1.78倍入球細仲划算喎！（有線201及301周三凌晨4:00直播）

高柏尼刑滿復出

曼城近期黑到爆，繼足總盃不敵曼聯出局後，喺聯賽盃4強再輸畀利物浦提早畢業，家陣只得番歐霸盃同英超可以爭。呢支「億萬大軍」近期突然大跌Watt，朱楓覺得除咗因為托尼兩兄弟去咗踢非國盃，後防重心高柏尼停賽先最大鑊，好在呢位隊長停賽4場後今晚終於刑滿復出，頂番甩漏多多嘅史提芬沙域，曼城後防應該會少失好多無謂波。


不過講到尾，朱楓今場都唔敢推介曼城客W畀大家，一來曼城今場繼續有前鋒巴洛迪利停賽，二來佢哋自從文梳亞喺08年入主後，7次對「拖肥糖」竟然輸足5次，好有格食格嘅味道。

愛華頓鋒將死火

相比起季初，愛華頓近期表現已經穩定番好多，對上10場只曾2敗，仲得1場失多過1球，可惜前線入波能力仲係好曳，對上10場只得2場入多過1球。其中卡希爾上場聯賽對布力般嘅入波，原來係相隔超過1年嚟首個士哥，前鋒沙夏更已經連續16場冇波入，難怪有傳球隊希望趕喺轉會窗關閉前簽入狼隊前鋒奇雲杜里或蘇超格拉斯哥流浪嘅射手謝拉域加強鋒力啦，今場對住防守力大增嘅曼城，怕且兩隊就算分得出勝負，都係一球起、兩球止！

橫數千軍

 拖肥主場少贏波

‧近8戰3勝3和2負，有5場總入球開2球。

‧聯賽主場3勝3和5負，勝率僅27%。

 曼城近戰旺開單

‧近8戰3勝2和3負，對上7戰有6場開單。

‧自文梳亞08年入主後，7次對愛華頓輸足5次。