畀愛華頓食到應 曼城讓波冇着數

猪拉多纳

31/01/2012
文： 樂比堅尼

另一場重頭戲，愛華頓主場對曼城，樂比仔捧愛華頓。曼城近期表現冇季初咁Sharp醒，加上近年作客葛迪遜公園球場輸多贏少，逐漸復甦嘅愛華頓係時候威番鋪，捧「讓球主勝」。




曼城季初踢得好順，但近期成績一般，近八仗僅得三勝，其中近五場作客僅贏過韋根一場，表現同季初相比真係相差好遠。其實曼城狀態滑落，同季初球員搏得太盡有關，加上托尼兄弟離隊踢非洲國家盃，兵源調動上亦冇之前咁充裕，曼城近期後防頻頻失波，近兩仗失咗四球，球員精神唔集中，隨時畀愛華頓偷雞成功。


作客愛華頓輸多贏少


事實上，愛華頓近年堪稱曼城嘅剋星，近六次主場對曼城取得四勝一和一負佳績，當中包括上季反勝曼城二比一，可見曼城近年即使努力增兵，但對住「拖肥糖」都佔唔到甜頭。




愛華頓早前受到傷兵困擾，表現亦有所滑落，但經過一輪調整之後，近期似有起色，上仗足總盃擊敗富咸，踢出近期佳作，借將當路雲喺陣中肩負起鋪橋搭路嘅角色，表現相當稱職，今仗對曼城贏唔贏到好難講，但主場受讓就好有捧場價值！


愛華頓近六次主場對曼城賽果


日期 賽果




07/05/11 愛華頓2:1(0:1)曼城

16/01/10 愛華頓2:0(2:0)曼城

25/04/09 愛華頓1:2(0:1)曼城

12/01/08 愛華頓1:0(1:0)曼城

30/09/06 愛華頓1:1(1:0)曼城

04/02/06 愛華頓1:0(1:0)曼城