大敗陰影困擾頹兵

猪拉多纳

22/01/2012
文： Wendy

聽日就係年初一，我Wendy首先祝大家龍年行大運，波馬常中！尋日就年廿八，大家唔知洗咗邋遢未呢？寧可信其有啊，新年前洗乾淨間屋，下年先可以有運行，所以我已經用1比99漂白水把全屋擦乾淨，相信好運已到屋，今晚心水有着落。




呢一個年廿九英超賽會真係識做，安排兩場大戰上演，陪大家兔過龍年！除咗我哋平時嘅hd200同CH300 會如常直播外，hd204更加會用3D直播我愛隊曼聯作客阿仙奴，如果買咗3D電視今晚終於有用武之地，大家又點可以走雞？馬會初盤開出平手盤曼聯低水，對住阿仙奴咁不穩嘅後防可謂坐和望贏，平手盤曼聯我鍾意！


防線問題未解決


好多人都話阿仙奴會為首循環作客奧脫福慘敗二比八報仇，根本嗰場開乜賽果都好，呢兩隊一碰頭都會想把對方置諸死地，始終兩隊唔係咁老友。阿仙奴近期聯賽已連輸兩場，正經歷低潮，後防不穩正係領隊雲格最傷腦筋嘅問題，暫時二十一場聯賽失咗三十一球，當然大部分失球來自客場，但首循環之大敗確為兵工廠每位後防球員帶來心理陰影，惟寄望華美倫可通過體測上陣！中場阿迪達受傷有一定影響，另外邊鋒艾沙維雖然落場表現落力，但腳頭始終無靈，入波都只寄望尹佩斯，至於回巢的亨利亦有微傷未必上陣。




曼聯當然近態亦唔比主隊好太多，月初亦有兩連敗紀錄， 但作客成績屬眾英超球隊最佳，往績上，九次面對阿仙奴贏咗七次，另外最近頭髮返晒嚟嘅朗尼，近六次對阿仙奴入咗五球，佢嘅表現亦係今場關鍵。




（有線200、300及204台周一凌晨零時直播）


Wendy推介曼聯 平手盤


熱愛舞蹈的Wendy，04年歐國盃Euro Babe變身成有線球彩台節目主持，當初對足球猶如混沌初開，依家已滾瓜爛熟，最愛暢談波經。

phone波熱線：1831 678

電郵：soccer64@cabletv.com.hk

「球彩台俱樂部」晚上10:00-深夜2:30