撐史篤城步步高升

猪拉多纳

21/01/2012
文： 江忠德

喺度首先祝各位讀者龍年行大運，步步高升！喺英超講到步步高升，就非史篤城莫屬，佢哋現時高踞聯賽榜第8位，隊波又高佬如雲，轟炸戰術係佢哋嘅撒手鐧，今晚主場迎戰近況麻麻嘅西布朗優勢相當明顯。




史篤城球員嘅平均身高喺歐洲球壇都算數一數二，擁有咁優越嘅制空權，當然要好好利用，佢哋唔同對手爭控球率，反而集中提高兩邊斬中同埋禁區接應嘅效率，再加上響晒朵嘅手榴彈戰術，對手防線隨時畀班大隻佬撞散。事實上當全世界都模仿巴塞嘅時候，傳統嘅高Q大腳已經歸類到「那些年」系列，難得史篤城肯為英倫復古踢法保育一番，實在值得支持同尊重。


西布朗近5次作客對賽4敗


對手西布朗由幾年前喺英甲、英冠到依家嘅英超，一直都畀史篤城食住，近5次作客對賽輸咗4場，況且佢哋近期狀態唔掂，近3場英超全敗，當中仲有兩場喺主場輸波，今鋪作客出戰就更難樂觀，以佢哋僅有嘅兵源，根本應付唔到近期密集賽程，相信史篤城可以撞到佢哋歸「西」！（有線201及301周六晚11:00直播）