富咸辭歲打「鵲」食尾胡

猪拉多纳

21/01/2012
文： 郭球奇

兔年最後一擊，當然想贏波攞番個尾彩，更何況呢3分對富咸護級極之重要，今晚主場對紐卡素，可以話不容有失，睇番佢哋今季喺卡雲農舍球場出擊戰績超勁，近年又捉慣「喜鵲」，主勝有1.83倍真係抵玩o架！（有線200及300、廣東體育周六晚11:00直播）




上周富咸表現令人失望，作客布力般流浪喺大部分時候以眾凌寡，竟然都以1:3落敗，不過今晚返番主場出擊，球奇有信心佢哋可以反彈，首先富咸今季喺卡雲農舍球場出戰戰績超勁，先後贏過利物浦同阿仙奴，榜首曼城嚟到都要擺低2分。




富咸近排仲有喜訊，就係成功同正選門將舒華沙續約至2013年，消息指呢位澳洲門將今晚可能復出把關，丹普西、拜仁雷斯、森莫亞同杜夫等攻擊好手自然更放心進攻啦！要捕「鵲」話咁易。事實上，富咸近年主場對紐卡素戰績亦好靚，對上5次交手錄得4勝1負。


紐卡素3星踢緊非國盃


對家紐卡素近況回勇，上周贏昆士柏流浪後錄得3連勝，日前仲成功以1,000萬鎊簽入弗賴堡射手柏比斯施斯，可惜呢位上季德甲二號射手，今晚同丹巴巴亞及迪奧迪都去咗踢非國盃。更何況，紐卡素上場贏昆士柏一仗，冇咗丹巴巴亞鋒力真係好一般，貝斯同艾美奧比根本都難擔大旗，作客富咸嘅地獄球場，隨時隱形都似！


橫數千軍


 富咸主場7成不敗




‧近9戰7次開入球雙，當中只得2場冇波入。

‧聯賽主場4勝3和3負，不敗率達70%。

 紐卡素近3場開單

‧近期3連勝均於主場取得，而且均開出入球單。

‧今季聯賽30個入球，今晚冇份嘅丹巴巴亞佔50%。

富咸近5次主場對紐卡素戰績

日期 戰果

11/02/03 富　　咸 1:0 紐卡素

08/11/09 富　　咸 2:1 紐卡素

07/12/15 富　　咸 0:1 紐卡素

日期 戰果

07/02/03 富　　咸 2:1 紐卡素

06/01/14 富　　咸 1:0 紐卡素