赤道畿內亞贏盡地利

猪拉多纳

21/01/2012
文： Mic少

非洲國家盃周日凌晨展開，A組揭幕戰由主辦國之一嘅赤道畿內亞對利比亞，非洲球迷出名熱情，一有大賽往往蜂擁入場，因而不時發生意外慘劇，不過從好一方面睇，有國民全力支持，可以大大提升東道主士氣同鬥心，睇好赤道畿內亞能夠旗開得勝，平手盤抵玩。（now676周日凌晨2時30分直播）




赤道畿內亞喺國際球壇並唔入流，此前甚至未進身非國盃決賽周，但球隊近年獲得一批喺西班牙搵食嘅球員助陣後，已有唔少進步，尤其係射手保迪普効力拉科魯尼亞多年，大賽經驗豐富。另外，赤道畿內亞為咗爭取佳績，特意聘請巴西籍領隊基爾臣保羅執教，決心十足，對打響頭炮志在必得。


利比亞「戰後」重組交學費


仲有一個小統計可以同大家分享，過去四屆非國盃主辦國都可以小組首名出線，相信赤道畿內亞今屆應該亦唔會太失禮。




至於利比亞球員多數喺本土搵食，質素唔可以同赤道畿內亞相提並論，該國以往喺「狂人」卡達菲統治下，足球發展長期停滯不前。雖然利比亞足球現時已可以呼吸到自由新鮮空氣，但估計仍然需要經過一段長時間重建，先至可以同國際球壇接軌，佢哋喺今屆非國盃，恐怕要先交學費。