塞內加爾頂級箭頭射爆贊比亞

猪拉多纳

20/01/2012

非洲國家盃首日尾場激戰，將上演塞內加爾鬥贊比亞，前者喺主帥阿馬拉查奧爾精心打造下，成為一支坐擁大量歐洲頂級聯賽球星嘅年輕生力軍，相反贊比亞只靠業餘兵壓陣，質素始終差一截，「讓球主勝」係不二之選！


塞內加爾上屆未能打入決賽周，喺短短2年間突然浴火重生，46歲嘅主帥阿馬拉查奧爾絕對係功臣，喺冇糧出、返國訓練嘅機票錢都要球員自己倒貼嘅情況下，全憑阿馬拉查奧爾做精神領袖，將塞內加爾重新打造成一支勁旅。塞軍大部分球員都係嚟自頂級聯賽，鋒線更包括弗爆嘅紐卡素射手丹巴巴亞同佢嘅新隊友柏比斯施斯，再加上上季法甲神射手蘇維，難怪可以喺外圍賽6戰攻入16球兼殺敗喀麥隆啦！


1993年贊比亞國家隊遇上空難，23名球員全部喪生，當時佢哋正正係前往塞內加爾踢世界盃外圍賽，嗰陣嘅國家隊隊長、現任贊比亞足總主席比禾耶未有登上該班「死亡客機」，佢矢言要喺今屆非國盃爭取佳績，獻畀罹難隊友，更以「打入8強」為最低要求！

贊比亞靠業餘兵難發圍

但係今次再戰塞內加爾，贊比亞要攞到好成績並唔容易，除咗質素差距，國家隊早前仲發生內亂，班球員夾手夾腳踢走前任領隊班列特，贊比亞足總先請番雷納特回巢收拾爛攤子。不過隊波大多數球員都係嚟自非洲聯賽，更有部分係業餘球員，要同粒粒皆星嘅塞內加爾抗衡，實在係強人所難。