皇馬暴鋒夷平巴塞

猪拉多纳

18/01/2012
文： 朱楓

國家打吡又嚟啦！西班牙盃8強首回合今晚爆發，皇家馬德里喺巴拿貝球場迎戰巴塞隆拿。雖然衞冕嘅皇馬賽前又傳迪馬利亞再傷過，不過之前話提早收咧嘅比比原來冇事，今晚可以披甲，配合超高效率嘅「三叉戟」掛帥，應可搞掂作客腳軟嘅巴塞，平手盤撐皇馬，坐走望贏！（now632台周四清晨5:00直播）




皇馬同巴塞今季又喺西班牙盃8強碰頭，重演上屆決賽翻版戰。上屆「銀河艦隊」憑12碼捧盃，不過之後5次交手，皇馬都未試過喺法定時間KO巴塞，不過大家唔好忘記，莫連奴一向勁要面唔輸得，賴咗幾次嘢，佢仲唔學精咩？仲有呀，大家只要細心啲睇，其實「寸王」專係喺大戰先收死巴塞，以往佢教車仔同國米，一樣係重頭大戰先搞掂「地上最強」，今晚呢場波咁關鍵，分分鐘又係佢發威之時。


收咧係流料！比比今晚披甲


國家打吡咁大件事，賽前當然係謠言滿天飛。皇馬今仗有後衞艾比路亞停賽，本來準備復出嘅翼鋒迪馬利亞，又話練波整親，今晚只係會做觀眾；前晚仲傳出中堅比比因右膝十字韌帶撕裂提早收咧，好在到咗尋日，《馬卡報》證實呢單嘢只係流料，大髀肌肉有傷嘅比比，今晚一定可以披甲，有佢鎮守防線，皇馬前邊啲人大可放心進攻啦！




最重要嘅，係「銀河艦隊」前線有賓施馬、希古恩同C朗組成嘅三叉戟！3位球星今季加埋已入咗60球，效率仲要入晒西甲前5（見附表），朱楓相信佢哋只要保持水準，要超越08至09年度球季、巴塞前鋒亨利、美斯同伊度奧一季入100球嘅紀錄，成為史上最強三叉戟只係時間問題，雖然呢3位仁兄好少同時落場，不過一有咩依郁，朱楓肯定莫帥會用盡佢哋，打殘巴塞。


「地上最強」豆腐防線作客曳


巴塞日前喺西甲主場對貝迪斯雖然贏波，不過大家有睇波的話，都見到巴塞喺一度領先2球下被對手追平，條防線堅唔掂，今晚「地上最強」依然有前鋒韋拿、柏度洛迪古斯、阿費利同後衞方達斯缺陣，而且佢哋喺西甲作客8戰只得3勝，今鋪要再贏皇馬真係唔易。


西盃賽制：


採主客兩回合淘汰制，今輪為8強首回合，若總比數相同，作客入球較多一隊晉級，再和則於次回合後加時作賽。若加時入球數字相同，客隊將憑作客入球優惠晉級，若加時沒有入球，則需互射12碼決勝。