頹城讓唔起韋根

猪拉多纳

16/01/2012
文： 樂比堅尼

香港時間周二凌晨英超獨腳戲，韋根主場對曼城。曼城接連於足總盃及聯賽盃敗陣，氣勢明顯冇季初咁銳利，加上部分主將缺陣，今仗面對一心防守嘅韋根隨時有麻煩，客W太熱唔抵玩，樂比仔建議捧「讓球主勝」及大盤！（有線200及300台周二凌晨4時直播）




曼城近期表現認真麻麻，近五場僅得一勝一和三負，兩項本土盃賽輸波，球員信心難免動搖，畢竟佢哋身份係挑戰者，而唔係曼聯、車路士呢類擂台躉，如果氣勢被打窒咗嘅話，隨時一直沉淪落去！


曼城天殘地缺


曼城嘅回落，除咗因為季初谷得太盡，近期陣容不整都係原因之一，大軍今仗續有隊長高柏尼停賽、托尼兄弟踢非洲國家盃，而大衞施華同巴洛迪利有傷，上陣機會只係五五波，冇咗以上呢幾位主力，戰鬥力難免打折扣，就算作客失分，樂比仔都唔會感到意外。




睇番韋根目前聯賽排包尾，可以話係好合理嘅位置，呢隊波最大問題係攻不銳守不穩，而且仲莫財，係今季降班熱門之一，但值得留意係佢哋今季對強隊成績不俗，主場曾守和過利物浦同埋車路士，呢個靚績絕對不容忽視。


敲韋根「+1」、「大」


另一個值得留意嘅數據係韋根今季嘅入球，有39%係來自禁區外，屬全英超最高，正所謂明槍易擋，暗箭難防，韋根呢類冷箭真係有其威脅力，曼城自高柏尼缺陣後防線多漏洞，今場畀韋根偷到雞一啲都唔奇，「讓球主勝」及大盤都值得一試。