巴塞大屠殺

猪拉多纳

15/01/2012


貝迪斯見到巴塞上仗失分肯定頭擰擰，事關狂怒巴塞又要開殺戒！巴塞隆拿上輪西甲贏唔到，今輪主場撲擊貝迪斯唔係人咁品，翻睇本季佢哋於西甲失分後，翌場聯賽曾大炒過馬體會等，最勁係數奧沙辛拿八粒，今戰大細中位數去到3.5球冇有怕，要大盤！




（now 632周一凌晨4時30分直播）




巴塞上輪聯賽大意失荊州，作客僅同愛斯賓奴打成一比一，依家西甲已落後皇馬五分，要後來居上爭標，未來再冇失分空間。巴塞話明係「地上最強」，佢哋贏唔到只係輸自己，今次打醒精神返到魯營球場，又點會放過貝迪斯？現時巴塞只有韋拿及小將方達斯兩個傷兵，剛啱擸走國際足協金球獎嘅美斯，以及恩尼斯達、沙維、阿歷斯山齊士等全部可以候命上陣，巴塞力足大炒。




正所謂受傷獅子係最危險，本季巴塞於聯賽五度失分後，翌場西甲取得全勝戰績，其中四戰包括大炒奧沙辛拿、馬體會八比○及五比○，又曾贈過薩拉戈薩同華歷簡奴四蛋，攤路咁明顯又點可以唔捧場！貝迪斯近期回勇，已連勝三場，其中辛達告魯斯同佐治摩連拿腳風都順，佢哋本季作客皇馬就輸一比四，今仗入波必多，捧大啱數。


大學研究美斯點解咁勁


另外，新球王美斯勁到冇朋友，全球球隊都積極研究防範佢嘅方法，但查實對美斯感興趣嘅又點止球圈中人，一間來自荷蘭嘅大學近排就決定撥款50萬歐元（約500萬港元）進行一項重大計劃，搵美斯做研究對象，了解吓佢個腦點解可以喺移動嘅一瞬間做出咁多完美嘅決定，並期望研究結果可以帶嚟醫學貢獻。