馬瑟韋爾恰慣恩華尼斯

猪拉多纳

14/01/2012
文： RICHARD WELBING

蘇超向來都只係格拉斯哥流浪及些路迪兩大班霸之爭，其他球隊雖然無緣問鼎錦標，不過間中亦會予人驚喜演出，馬瑟韋爾今季表現就令人眼前一亮，隨着馬軍上周於蘇足盃大勝昆士柏四比○，相信呢支異軍今周可於主場擊敗恩華尼斯，一掃早前聯賽兩連敗頹風，1.75倍主Ｗ值得支持。




（周六晚11時開賽）


積分尚有進步空間


馬瑟韋爾今季二十場聯賽輸咗六場，不過對手全部都係前列球隊，除咗兩負些路迪及兩負流浪，其餘兩場就輸畀第四位嘅赫斯及第五位嘅聖莊士東，換句話說佢哋面對一些榜下游球隊都甚有搶分把握。要留意馬瑟韋爾目前比一眾球隊少踢一至兩場，積分上仍有進步空間，主場出擊戰意必高。




恩華尼斯近況一般，上周蘇足盃主場對聯賽包尾嘅鄧弗姆林，要踢到最後一刻才由約拿芬希尼斯追成平手，取得重賽機會，而且佢哋今季兩鬥馬瑟韋爾均落敗，兩場都要失三粒，今次作客料凶多吉少。