巴塞力爭第100場打吡W

猪拉多纳

08/01/2012
文： 走肖

西甲「加泰打吡」係今晚足智彩壓軸場次，愛斯賓奴喺主場對巴塞隆拿，唔似頂得住唔輸。呢場係雙方第131次打吡戰碰頭，過去巴塞合共贏出99次，今仗只要再贏就可以突破100大關，試問巴塞班球員為創歷史點會唔搏；其次係王牌美斯踢埋今場就會出席國際足協頒獎禮，如無意外會再拎FIFA金球獎，梗係要開1.47倍「讓客」來振聲威！（now632台及廣東體育周一凌晨4:30直播）


糟質「愛奴」預祝美斯攞獎


巴塞喺西班牙盃以4:0大勝奧沙辛拿，最值得留意係特權分子美斯放多4日假後堅持落場，結果佢後備上陣梅開二度，證明冇因為放假狀態下滑，而且跟手美斯要去瑞士出席國際足協頒獎禮，FIFA金球獎同最佳教練兩個大獎，睇怕係美斯同哥迪奧拿袋硬，呢個時候點可以失威？




仲有呀，據講巴塞中場恩尼斯達傷愈可以復出，就算前鋒韋拿要養傷，問題都唔大。唔好忘記，上年美斯領獎前巴塞以4球淨勝拉科魯尼亞，佢自己都有波入，相反愛斯賓奴剛啱喺西班牙盃輸畀乙組仔科爾多瓦，感覺又開始跌Watt，好難阻到美斯騷哥利，相信連敵對嘅愛斯賓奴球迷都要為佢拍手。