潛艇漏水 益晒華倫

猪拉多纳

08/01/2012
文： Sherry



防線唔掂新帥有排執


2012年第一次同讀者見面，隔咗「成年」冇見，大家有冇掛住Sherry先？小妹就好掛住你哋喇，放咗幾日假，真係「身在Party心在太陽波經」，所以一返屋企就即刻搵料，睇吓各支西甲大軍嘅備戰情況，今晚華倫作客維拉利爾，小妹就認為華倫贏面幾高，小讓平半，一於撐上盤啦！（now632台周一凌晨1:00直播）




小妹對今個假期真係冇乜Feel，可能人大咗啦，有時反而覺得一個人煲劇，又或者同兩三個知己靜靜哋吹下水仲開心、仲舒服。唔知呢，正如神劇插曲所講，「青春的詩總會老，時間多恐怖」，其實年少好、年老都好，只要開開心心就最好，呢一刻小妹享受寧靜，間唔中參加吓聚會玩吓就算喇，年少輕狂嘅日子，回味吓就夠啦！哈！




華倫蘇爾達杜着晒火




講番波，西甲歇冬期終於完結，當中維拉利爾近期炒咗搞到隊波一鑊粥嘅教頭加列度，提升B隊41歲少帥摩連拿揸旗。老實講，小妹真係覺得換帥換得太遲，「黃色潛艇」嘅防線「漏水」問題勁嚴重，近8戰輸足6場，場場有失波，可惜家陣仲未增兵，一時三刻好難起死回生。




仲有，維拉利爾今仗三線都有主力缺陣，包括前鋒基奧斯比羅斯、中場梅巴拉克同守將荷西卡達拿，實力減半，搵莫連奴教都唔掂啦，更何況係B隊教頭摩連拿？

對家華倫新年第一擊，即喺西盃小勝西維爾，證明班人放完假仲係咁掂。華倫陣中，小妹最欣賞嘅就係前鋒蘇爾達杜，呢件土炮開季至今有11粒聯賽入球，放完假仲主動加操，難怪華倫係繼皇馬同巴塞之後，第3多士哥嘅西甲豪門啦！今晚華倫作客只係小讓維拉利爾平半，1.97倍上盤博得過o架！

Sherry靚盤

華倫西亞（上盤）