車仔二線兵發「茅」保前途

猪拉多纳

08/01/2012
文： 郭球奇



傳換血大清洗


今晚足總盃第3圈除咗曼市打吡，其實車路士主場對樸茨茅夫呢場前屆決賽翻版戰亦一樣好矚目！雖然「藍戰士」今晚冇晒班非洲兵，最近又傳出大換血，剩低班球員為前途肯定搏甩髀；樸茅自從降班後實力已經今非昔比，近日仲傳就快易手，試問班球員點專心應戰？加上一向作客史丹福橋就腳軟，1.42倍「讓主」熱得有理！（開賽時間：周日晚11:00）


車路士Vs樸茨茅夫


車路士同樸茨茅夫近年都係足總盃決賽常客，車仔近5年3度捧盃，樸茅08年亦捧過，兩隊喺2010年更喺決賽相遇，最終車仔憑杜奧巴入波小勝1:0。




事隔兩年，兩隊變化都好大，先講車路士，雖然今季簽入「新莫連奴」保亞斯兼買入桑馬達，但效果一般，有傳班主阿布非常不滿，已下令保亞斯嚟緊着手大清洗，傳聞因踢非國盃今晚肯定缺陣嘅杜奧巴、沙洛文卡勞同約翰米基爾都有份被踢走，屬於邊緣人嘅費蘭度托利斯同林柏特假如今晚有得落場，肯定搏甩髀都似，畢竟車路士同時間喺度積極進行增兵，有傳最快今日就會落實以700萬鎊簽入保頓中堅加利卡希爾添！


樸茅又傳賣盤損軍心


相對「藍戰士」，樸茅變化更大，10年更因財政出現問題喺英超降班後，球星四散，領隊又成日換。近日樸茅更傳出將再次易手，前景不明朗，試問班球員又點專心應戰？而且近7次作客交手仲要全敗，未打心理已經輸咗一半啦！