曼城無敵主場強陣降魔

猪拉多纳

08/01/2012
文： 力奇

爭取衞冕足總盃嘅曼城，今晚喺第3圈主場迎戰宿敵曼聯，恃住佢哋個無敵曼城體育場11連勝氣勢，自然足以秤先。況且紅魔近況不濟，領隊費格遜生日過後頭頭碰着黑，莫講話報仇雪恨，今晚想頂住唔輸都難，曼城讓平半，我捧1.75倍上盤。（now671及672台、廣東體育周日晚9:00直播）


地頭11連勝氣勢勁過奧脫福


曼城喺英超主場已經累積跨季15連勝，挑戰緊紅魔嘅19連勝紀錄，即使話計埋歐聯同聯賽盃等，佢哋主場一樣打出11連勝佳績，今時今日嘅曼城體育場似乎較奧脫福同史丹福橋等更具壓迫感，大有王者降臨嘅氣勢。




主場威力夠，曼城球員應付危機能力亦持續提升，之前佢哋連續2場聯賽失分兼冇波入，但返到主場對利物浦即踢番勁旅本色大勝3球。反觀紅魔正經歷10個月來首次2連敗，仲要只係對住紐卡素同布力般，最慘係如果今仗再輸，更係自01年5月後首次3連敗，球員壓力有幾大毋須多講。




曼城雖然今場開始冇咗去踢非國盃嘅托尼兄弟，但防線仲有尼史葛拍住高柏尼頂住，中場線巴利停賽，又有夏格維斯及時傷愈可任後備倒戈，領隊文仙尼仲有大把籌碼喺手。仍然可以派強陣出擊。


曼聯中後場繼續鬧兵荒


反觀曼聯近排話就話有「小豌豆」同路爾斯安達臣等傷愈，但明顯狀態未足，同時中後場兵荒問題仍未解決。最慘近排又有朗尼同費Sir鬧不和，影響軍心，況且紅魔上次喺主場對曼城都要輸1:6，今鋪作客再輸有乜出奇？


橫數千軍


曼城主場4場不失

‧今季10場英超主場全勝，當中8場開大。

‧連續4場主場賽事未有失球。

紅魔近戰旺開大

‧近8仗5勝3負，其中6場開大。

‧除上仗負紐卡素外，每仗均能取得入球。