巴塞「讓球客勝」可愛

猪拉多纳

08/01/2012
文： 法比加輝

今輪西甲上演加泰隆尼亞打吡戰，愛斯賓奴主場鬥巴塞隆拿。「地上最強」未有受到歇冬期影響，小休兩星期後在上周中西班牙盃照樣大數奧沙辛拿，「雙斯」法比加斯同美斯仲齊齊梅開二度，反映巴塞狀態仍然「托弗」。再者巴塞近期化身「財神」連續八場贏波贏盤，建議今場續捧巴塞「讓球客勝」。（now 632周一凌晨4時30分直播）




經過歇冬小休之後，老實講狀態走樣都在所難免，可幸巴塞仍然保持強勢，上周中大勝奧沙辛拿四比○，繼續當對手係馬騮咁搓。其實巴塞大部分主力歇冬期仍有比賽，好似域陀華迪斯、碧基、法比加斯及布斯基斯等就代表了加泰隆尼亞出戰國際熱身賽鬥突尼西亞，唔會放假放到冇晒球感。


愛斯賓奴無力招架


再者巴塞近期嘅表現，簡直可用無懈可擊嚟形容，近八場比賽贏波贏盤之餘，最恐怖係八場中有七場淨勝四球或以上，唯一一場贏唔到四球嘅對手就係皇家馬德里，但其實都贏「艦隊」三比一，可想而知巴塞狀態有幾「神」！不過主隊愛斯賓奴都收到一個好消息，就係陣中嘅非洲兵羅馬歷冇入選國家隊，毋須應付非洲國家盃，今場亦可披甲上陣，不過愛斯賓奴都阻唔到弗爆巴塞㗎啦，「讓球客勝」要捧。