「齊天大聖」玩晒 熱刺弗爆攻到你「雲」

猪拉多纳

31/12/2011
文： 走肖

點夠你玩呀？史雲斯今晚喺英超主場對熱刺，3分凍過水，因為熱刺嘅「齊天大聖」加里夫巴利，真係識得72變咁款，佢唔止由左閘改踢左翼出晒位，日前贏諾域治更加變身進攻中場「AMF」包辦兩個入球，有佢幫手，熱刺1.62倍客W抵捧。（有線204及304周六晚11:00直播）


史雲斯唔識入波


由於前鋒迪科爾同翼鋒艾朗連儂未好番，根據熱刺領隊夏利列納形容，現時佢哋用緊4321陣式，單箭頭係艾迪巴約，兩個進攻中場係雲達華治同加里夫巴利。大家可能覺得，主要靠速度搵食嘅「齊天大聖」，改踢進攻中場未必適合，但日前贏諾域治佢話畀大家知睇錯，梅開二度搞到巴塞隆拿又傳出話想斟佢。




當中加里夫巴利攻入嘅第2球，由半場喪跑到對方禁區射入，個人今季聯賽累積7球進帳，而且熱刺喺季初連續輸畀曼聯同曼城後，近15場聯賽其實有12勝2和1負，得勝率高達80%，相反史雲斯近8場有5次冇波入，右閘安祖蘭基剛啱又傷埋，加上後衞尼爾泰萊同阿倫達迪未傷愈，隨時畀加里夫巴利玩到暈陀陀。