阿仙奴怒炸昆士柏出氣

猪拉多纳

31/12/2011
文： 巨高

除夕晚繼續有英超上演，其中一場由倫敦球隊阿仙奴主場對昆士柏流浪。阿仙奴上輪聯賽未能喺主場完勝狼隊，賽後領隊雲格詐晒型，批評球員輕敵兼唔認真。今場遇到另一支下游球隊昆士柏流浪，相信阿仙奴球員唔會犯相同錯誤。只要「兵工廠」肯認真作賽，今場有力以大比數狂勝昆士柏流浪，大盤值得捧場。（有線301及201台周六晚11時直播）




阿仙奴以往喺主場比賽好平穩，好少失分畀弱勢球隊，所以剛賽打和狼隊之後，雲格顯得極之火滾，訪問時塊面仲燶過包公。為要氹番佢老人家，球員有必要踢番場好波。何況今季目標係打入聯賽頭四位，球隊更加冇失分空間，爭勝鬥志唔使懷疑。有一項數據好值得提出，就係阿仙奴最近一次對昆士柏流浪就大勝六比○，今次再以大比數勝出唔奇。


尹佩斯要破入波紀錄


至於人腳方面，暫時預計與上輪鬥狼隊時差唔多，其中尹佩斯繼續擔正，呢位「神奇廠長」有意打破舒利亞喺1995年所創下一年內取36個聯賽入球紀錄。如果尹佩斯今晚入兩粒就追平，破紀錄就要三粒或以上，想話創新猷就要搏到盡咯！另外謝雲奴、阿迪達及班拿約等隊員，就會喺中前場替尹佩斯「開路」兼組織攻勢。主隊進攻陣容尚算完整，要爭取入球唔係難事。




昆士柏流浪近期都踢得幾沉，自從十一月勝過史篤城之後就唔識贏。實力有限無謂憧憬。實在今場阿仙奴志在必得，昆士柏流浪質差慘敗唔奇，大盤係唔錯嘅選擇。