車仔發維開香檳 英超除夕夜開騷

猪拉多纳

31/12/2011
文： Mic少

英超大除夕連場大戰，車路士急需全力踩油追趕曼市雙雄，翻查車仔過去十年年尾最後一場聯賽，錄得七勝二和一負，其中六次主場出擊，更獲得五勝一和佳績，今晚喺史丹福橋球場迎戰阿士東維拉，可望輕取對手，捧「讓球主勝」。（有線200及300台周六晚11時直播）




車路士已落後曼城及曼聯十一分，看似好遙遠，但唔好忘記仲有半季時間追，爭標仍未絕望，最緊要係唔好再失分。




車仔已連和三場，以佢哋級數，冇理由連續四場失分咁失威。今場主W被壓低至1.18倍，似乎暗示車仔將會大爆發，贏番場漂亮勝仗。事實上，維拉今季聯賽對曼城、熱刺、曼聯、利物浦及阿仙奴都敗陣，明顯欺善怕惡，今仗淨輸兩粒好合理。


加利卡希爾勢上「車」


保頓領隊奧雲高尼尋日表示，會方與車路士就加利卡希爾轉會費已達成共識，只待傾掂個人條件，喺轉會窗重開後就可以落實交易，但奧帥就要求加利卡希爾喺轉會前專心為保頓搶分。另外，保頓正計劃斟介紐約紅牛守將添列姆作為替補。


大除夕特旺主隊


另外，過去十年英超年尾最後一個比賽日，共有三十二場，比較有參考價值係○五年及○六年，呢兩年分別有十場及九場聯賽，情況同今年相似。○五年大除夕十場英超，六場由主隊勝出，和波及客勝各兩場。○六年九場波，主勝同樣佔六場，客隊僅兩勝及一場和波。


英冠水晶宮「１」定中


英冠方面，水晶宮值得留意，佢哋過去五年年尾壓軸戰，全部都開細，其中三場打和，另外兩戰一勝一負，總入球都係「1」球。屈福特剛好相反，過去四次有三次開大。另外，諾定咸森林最威水，已連續三年於年尾壓軸戰贏波，當中兩場淨贏對手兩球或以上。

車路士過去10年 年尾最後一場聯賽成績

30/12/2010 主場勝保頓1:0(0:0)

28/12/2009 主場勝富咸2:1(0:1)

28/12/2008 作客和富咸2:2(0:1)

29/12/2007 主場勝紐卡素2:1(1:0)

30/12/2006 主場和富咸2:2(1:1)

31/12/2005 主場勝伯明翰2:0(2:0)

28/12/2004 作客勝樸茨茅夫2:0(0:0)

28/12/2003 主場勝樸茨茅夫3:0(0:0)

28/12/2002 作客負列斯聯0:2(0:2)

29/12/2001 作客勝紐卡素2:1(2:1)