布力般信錯高層賣錯身

猪拉多纳

31/12/2011
文： 蘇豪

布力般流浪戰績低迷，愈戰愈危，粉絲們開始聞到英冠味，群起於場內場外賣力示威，強烈要求領隊堅恩下台。反對派訴求簡而清，球會管理層卻集體失聰，完全漠視民意，堅恩台型、名氣、資歷、戰績瓣瓣冇，憑乜令印度老細對佢不離不棄呢？




布力般印度老細入主初期開出N咁多張空頭支票，豪言會燒錢力斟天王巨星，點知得個講字，最強新兵只屬愛華頓棄將耶高保，講過的卡卡、細哨同碧咸呢？球會言而無信，管治威信蕩然無存，民望極低。布力般老細一毛不拔，明顯係孤寒財主，殺入英超純粹為搵銀，視球會榮辱於不顧。


孤寒財主搵傀儡擋箭


一間球會若想爭取佳績，理應任命有能者為帥，帶領球隊爭取佳績。堅恩能力有限，無力用蔗渣兵踢出燒鵝味，成為球迷洩憤對象，被插至體無完膚好合理。不過，堅恩最大賣點正是「百冇」，老細話乜就乜，只屬傀儡教頭，任人擺布，而且夠平夠聽話，仲可以做擋箭牌，點會輕易調走佢先？




布力般粉絲反堅恩情緒高漲，本來眾怒難犯，不過球會主帥任命向來只由管理層決定，球迷就算再吵再鬧亦難左右。堅恩面對任何批評照單全收，但仍賴死唔走，面皮厚過電話簿。貪錢老細加廢柴主帥，布力般擁有如此絕配，來季英冠見啦！