波琴撼拜仁「大」無畏

猪拉多纳

20/12/2011
文： 走肖

聖誕好快到，今晚德國盃16強波琴主場對拜仁慕尼黑有直播，簡直係放假準備捱夜最佳熱身，咁嘅情況買大等睇入球騷最好，首先波琴射手鄭大世嘅紀錄電影平安夜喺日本上映特別場，難免要入波造勢，其次拜仁歇冬前例開大，慣晒踢「聖誕快樂足球」，1.42倍入球大咪嫌奀。（翡翠台周三凌晨2:00直播）




上季喺附加賽輸波，爭取升班失敗嘅波琴，暫時喺德乙排第9位，正因為咁，有報道話鄭大世會喺1月離隊，避免喺德乙嘥心機、捱眼瞓。不過無論消息真定假，鄭大世呢場都唔似會Hea踢，因為佢嘅個人紀錄電影《Tese》，平安夜喺涉谷上映特別場，到時佢會現身搞埋簽名會，呢個時候點衰得？




當然，北韓最高領導人金正日逝世，都可能成為鄭大世嘅入波動力，佢出名愛國，假如能夠攻破拜仁大門，相信可以減輕佢嘅悲傷。


拜仁放假前例牌喪攻


對手拜仁有中場舒韋恩史迪加養傷，好彩翼鋒列貝利唔使停賽住，加上佢哋近期火力持續強勁，近12場有10場開入球大，仲有呀，對上5季歇冬前嗰場波，拜仁全部開入球大，包括上季德國盃作客以6:2大炒史特加，同埋前季聯賽主場以5:2打沉哈化柏林，證明放假前特別鍾意喪攻，而且拜仁喺1月2號會出發到卡塔爾，進行1個星期掛名集訓嘅歎世界之旅，叉電迎接下半季賽事，情緒高漲有利再開入球大。


德盃及荷盃賽制：


今輪為16強賽事，兩項比賽以一場過分勝負，若法定時間內打成平手，則需加時作賽，再和則互射12碼決勝。