布力般保頓榜尾大廝殺

猪拉多纳

20/12/2011
文： 麥馬拿仁

明日凌晨上演兩場英超，重頭戲係護級生死戰布力般流浪主場鬥保頓。雙方深陷降班漩渦，兩名領隊堅恩同奧雲高尼隨時烏紗不保，必全力出擊求三分。布力般後防不整，近期已豁出去，近五聯賽全開大，一於追大盤！（有線201及301台周三凌晨４時直播）


兩軍主帥告急勢鬥攻


尾二布力般執極唔掂，正所謂寧為玉碎不作瓦全，主帥堅恩已放棄防守，要球員全力進攻爭取入球，故近九場聯賽除鬥車路士外，全部都入到波，其中鬥韋根同諾域治就打成三比三，近兩仗對新特蘭及西布朗亦臨尾香，連運都冇埋，加上後防人腳唔齊，沙加度、馬田奧臣同基維都缺陣，連上仗入球功臣史葛甸恩都傷埋，想唔大踢性感足球都唔得。




包尾大幡保頓現僅得九分，比布力般少一分，再唔搶分下季就英冠見，但球隊後防實在太曳，近五聯賽場場起碼失兩球，士氣曳到震，今仗生死戰守嚟無謂，分分鐘演入球騷。