慕遜加柏攞緬恩斯着數

猪拉多纳

18/12/2011
文： 蘇斯黑柴

德甲首循環壓軸戲慕遜加柏主場鬥緬恩斯，慕遜加柏上輪遭遇滑鐵盧，慘被降班膽奧格斯堡擊敗，相反緬恩斯上周中補賽作客喺優勢下賽和科隆，不過今仗形勢截然不同，慕遜加柏三大主力回歸，重返不敗主場有力擊退痛失王牌嘅緬恩斯，黑柴推介1.72倍主Ｗ。（有線61及201台周一凌晨零時30分直播）


主隊馬高列奧斯復出


慕遜加柏上仗作客不敵奧格斯堡，但陣容嚴重不整，今季取得10個入球及3個助攻嘅王牌馬高列奧斯，同今季場場踢足嘅防守中場洛特維迪因傷缺陣，主力射手迪甘馬高亦剛傷愈只任後備，攻守實力俱削弱下輸咗今季第4場作客賽事，不過今仗回師主場又唔同講法，慕遜加柏今季聯賽主場5勝3和未嘗一敗，今仗有馬高列奧斯、洛特維迪雙雙傷愈復任正選，迪甘馬高亦隨時可以上陣搏殺，以最強陣容出擊，有望喺2011年最後一場主場聯賽贏波謝幕。


客軍艾雲舒捷斯缺陣


緬恩斯今季實力大幅下滑，經過季初趁對手陣腳未穩急攻取得兩連勝後，之後步入9戰不勝低潮，好在好波之人艾雲舒捷斯踏入11月份喺逆境下爆發，連續3仗場場入波兼有助攻，協助球隊喺史特加、拜仁同禾堡身上搶到7分，可惜好景不常，艾雲舒捷斯前仗對漢堡勇戰受傷，要到明年至可以復出，令球隊攻力大為削弱。




事實上緬恩斯今季作客除首戰贏過弱旅弗賴堡外，繼後6場作客未贏過，加上因為應付補賽關係，今仗係該隊9日內第3場硬仗，體力方面亦較輸蝕，作客唔夠強陣嘅慕遜加柏砌！